Para disa ditësh, u njoftua pjesëmarrja e Kryeministrit Rama në një Forum Ekonomik që do të zhvillohet në datat 4-6 Shtator në Toronto, metropolin kanadez ku mendohet që jetojnë rreth 30,000 shqiptarë. Lajmi ishte konfirmuar nga dy burime. I pari burim, organizatorët e forumit në fjalë, ku Flasshqip u akreditua si media. I dyti, një mesazh i ambasadës shqiptare në Ottawa, shpërndarë te një rreth i ngushtë në formë ftese për një darke me Kryeministrin Rama në datën 6 shtator.
Fotografia e Ramës u shfaq për ditë me radhë në listën e pjesmarrësve. Befas dje, (29 Gusht) fotografia është hequr nga Website i International Economic Forum of the Americas dhe një mesazh i dytë i ambasadës ka njoftuar të ftuarit për anulimin e darkës me Edi Ramën, fakte që konfirmuan kësisoj plotësisht anullimin e vizitës private të Kryeministrit shqiptar në Kanada.
FlasShqip, një portal që drejtohet nga Taulant Dedja, ish-deputet i PS-së, i cili prej vitesh jeton në Kanada, përmes një e-mail drejtuar zyrës së informimit të Toronto Global Forum më datë 29 gusht, mori konfirmimin e anulimit të pjesëmarrjes së Kryeministrit Edi Rama në këtë forum.
Nuk dihen shkaqet e vërteta të këtij anulimi. Arsye mund të jetë situata e rëndë politike në Shqipëri, por një nga arsyet mund të jetë edhe refuzimi i autoriteteve më të larta të Ontarios dhe Kanadasë per t’i ofruar atij një pritje të veçantë në kushtet e një vizite me ftesë të një OJQ-je private.
Ajo që dihet me siguri është që marrëdhëniet me Kanadanë kanë pësuar një krisje qysh nga historia me kompaninë kanadeze “Bankers Petroleum”. Marrëveshja për mbrojtjen e Investimeve prej atij momenti ka mbetur pezull dhe nuk nënshkruhet nga Qeveria Kanadeze. Ndërkohë, kujtojmë që Kryeministri i vetëm që ka vizituar zyrtarisht Kanadanë ka qenë Berisha në vitin 2007 (pak para pranimit të Shqipërisë në NATO), ndërsa vizita e fundit zyrtare e rangut të lartë ka qenë ajo e Ministrit të Jashtëm Bushati në vitin 2015.
Lajmi për ardhjen e Ramës krijoi jo pak reagime në radhët e komunitetit shqiptar në Kanada. Burime të sigurta provojnë që një pjesë e të ftuarve nuk konfirmuan pjesëmarrjen në darken me Kryeministrin, mes të cilëve edhe disa mbajtës të titullit “Ambasador i Kombit”, akorduar nga vetë Rama. Po kështu edhe nga radhët e kryetarëve të shoqatave shqiptare apo individualitete të shquara në komunitet.
Më një gjuhë diplomatike, por kuptueshëm refuzuese, iu përgjigjën Ambasadës dhe dy anëtarët e Këshillit Koordinativ të Diasporës Adriana Bejko dhe Ardian Radovicka. Këta të fundit, kërkuan publikisht që në vend të darkës të organizohej një takim i zgjeruar me komunitetin i Kryeministrit, me prezencën e mediave. Një reagim tejet kritik ndaj Ramës ishte dhe prononcimi publik i intelektualit Endrit Mullisi, me origjinë nga Elbasani, i cili për shumë vite ka kryer dhe funksionin e Pastorit të Kishës Ungjillore Shqiptare të Torontos.
Flasshqip u informua gjithashtu që një grup pjesëtarësh të komunitetit shqiptar në Toronto po përgatisnin një protestë për të cilën kishin njoftuar dhe autoritetet kompetente. Protesta ishte parashikuar të mbahej në datën 5 shtator, para godinës ku do zhvillojë punimet Forumi Ekonomik, ditë në të cilën sipas konfirmimit në programin paraprak do merrte fjalen edhe Kryeministri Rama.
Ndërkohë, një grup prej 17 vetësh, emra të njohur nga e gjithe Kanadaja, i dērgoi më 25 gusht një letër Presidentit të International Economic Forum of the Americas, Nicholas Rémillard, në shenjë reagimi për pjesëmarrjen e Edi Ramës në aktivitet. Letra shprehte veçanërisht shqetësimin për situatën e rëndë politike në Shqipëri. Theksojmë që ky është rasti i parë që nga radhët e diasporës shqiptaro-kanadeze reagohet në mënyrë të organizuar ndaj krizës politike shqiptare dhe personalisht ndaj përgjegjësit kryesor për këtë krizë, Kryeministrit Edi Rama.
