Kryesia e Partisë Socialiste pritet të mblidhet këtë të mërkurë për të zgjedhur drejtuesin politik për Qarkun e Shkodrës. Personi që mbante këtë post, Valdrin Pjetri, dha dorëheqjen a marrja e postit të kryetarit të Bashkisë së Shkodrës dhe gjithë funksionet e tjera në PS, pas publikimit nga PD të dokumenteve të një gjykate në Itali, që tregonte se ai ka qenë i dënuar me burg dhe gjobë për trafik droge.
Ende nuk ka një emër që përflitet si pasardhës i Petrit.
Në mbledhjen e Asamblesë Kombëtare të PS të datës 23 korrik, kryetari i PS-së, Edi Rama, shkarkoi Ditmir Bushatin si drejtues politik të Qarkut të Shkodrës për t’ia besuar këtë detyrë kryetarit të sapo zgjedhur të kësaj bashkie, Valdrin Pjetri. Shkarkime të drejtuesve politikë pati dhe në Tiranë, të Blerina Gjylametit, dhe në Lezhë, të Lindita Nikollës. Por mbledhja e sotme e kryesisë mësohet se do të fokusohet tek organizimi i procesit të zgjedhjeve në Partinë Socialiste, kur kjo parti është futur në një proces zgjedhor, që nga kryetari i organizatës së partisë e deri te delegatët e kongresit.
Sipas kalendarit të miratuar në asamble, në 16 shtator PS do të futet në një proces zgjedhor të gjatë për të zgjedhur drejtuesit e rinj të strukturave. Procesi do të zgjasë 5 muaj, duke nisur me 15-ditëshin e parë të shtatorit, kur socialistët do të përgatitjen për mbajtjen dhe organizimin e zgjedhjeve për të kulmuar në votimin e delegatëve të Kongresit në janar të 2020. Edi Rama nuk ka preferuar që të kërkojë një mandat tjetër për ndërtimin e partisë, por e ka zgjidhur me Statutin e Partisë. Sekretari organizativ, Arben Pëllumbi, është shprehur se “Kryetari i Partisë, pas një procesi zgjedhor të fituar, automatikisht e merr mandatin. Në rast se PS nuk do të kishte fituar, atëherë kryetarit i lind e drejta të hyjë në garë dhe do të kishte pasur edhe një proces për kryetarin”.
