Eduart Kukan, ish-eurodeputet, dhe ish-kryesues i Grupit të Punës në Ballkanin Perëndimor në PE, shprehet se Maqedonia e Veriut ka shanse që në vjeshtën e 2019-ës të marrë një datë për hapjen e negociatave, ndërsa në rastin e Shqipërisë, thekson se kjo nuk do të ishte realiste.
Duke folur për procesin e integrimit të vendeve kandidate, Kukan shprehet se BE ka shtyrë hapjen e bisedimeve me Maqedoninë e Veriut edhe pse kjo e fundit ka vite që plotëson kushtet.
“Maqedonisë së Veriut mund t’i jepej një datë specifike në samitin evropian në vjeshtë, të cilën unë e konsideroj realiste, madje edhe Presidenti i Francës, Emmanuel Macron që kishte deklarata shumë kategorike për këtë çështje, duket se ai tashmë po i lehtëson ato.
Por situata në Shqipëri është krejt e ndryshme. Ajo duhet të zbatojë një reformë të madhe në drejtësi, opozita ka bojkotuar Parlamentin dhe mbi të gjitha, shqiptarët nuk mund të gjejnë kompromisin”, shprehet Kukan.
Ish-eurodeputeti nuk ka kursyer kritikat as ndaj Federica Mogherinit, Përfaqësueses së Lartë të BE-së për Politikën e Jashtme, për të cilën thotë se nuk ka treguar aftësi të mjaftueshme në rastin e dialogut mes Beogradit dhe Prishtinës.
“Në momentin kur Kosova po vendoste tarifa për Serbinë, ishte e nevojshme të udhëtonte atje dhe ta përplaste tavolinën”, thekson Kukan.
Ai nuk mendon se pasardhësi i Mogherini Josep Borrell do të bënte një punë shumë më të mirë.
“E mbaj mend si President i Parlamentit Evropian. Emërimi i tij më befasoi sepse spanjollët kanë politikë më dinamikë“, tha Kukan.
I pyetur për idenë e shkëmbimit të territoreve, e cila po qarkullonte rreth një viti më parë, ai vlerësoi se nuk ishte vetëm një strategji fushate.
“Unë parashikoj që çështja e zgjidhjes së njohjes së Kosovës përmes shkëmbimit të territoreve me Serbinë do të kthehet. Sidoqoftë, kjo mund të destabilizojë Bosnjën dhe Hercegovinën fqinje“, tha Kukan.
