Një tjetër kryebashkiak i Rilindjes është “kapur mat” në Greqi. Gazetari Stelios Moisidhis ka publikuar disa foto ku pavarësisht se nuk i përmend emrin, ka një ngjashmëri me kryebashkiakun e Prrenjasit, Nuri Belba.
Gazetari shkruan se ai është akomoduar në një hotel me 4 yje, me mëngjes të përfshirë, ku nata kushton rreth 138 euro, ndërsa prenotimi është deri në datën 31 gusht.
“Mediat greke, këtë herë nëpërmjet gazetarit të njohur Stelios Moisidhis, kanë publikuar një lajm tjetër në lidhje me një drejtues lokal të emëruar nga Rilindja, të cilit nuk i përmendin emrin por këtë herë e ilustrojnë me foto prezencën e tij në territorin grek”, shkruan faqja Bashkia Prrenjas në rrjet.
Ndoshta personazhi në foto nuk është kryebashkiaku i Rilindjes, po të kihen parasysh deklarimet e kryeministrit se deri në 2020, ai, ministrat dhe të zgjedhurit vendor do të bëjnë pushimet brenda territorit të Shqipërisë. Ose kryebashkiaku ka ikur pa lejen e Kryeministrit për të bërë pushime jashtë vendit dhe fatkeqësisht është “kapur mat” nga gazetarët grekë.
Pak ditë më parë mediat greke publikuan një lajm, sipas të cilit kryeministri Edi Rama kishte drekuar në Trikalla, i shoqëruar nga roje të shumta, por kjo u konsiderua nga Kreu i Qeverisë si një fake news.
Në fotot e publikuara nga gazetari, kryebashkiaku shfaqet në plazh me një uniformë paksa të çuditshme, por edhe me këpucë me majë.
