Kryeministri Edi Rama ka mbledhur drejtuesit politikë të qarqeve të veriut në një takim të zhvilluar në Shëngjin, ku ka diskutuar mbi situatën në Bashkinë e Shkodrës, atje ku ende vijon të jetë në detyrë si kryebashkiake, Voltana Ademi.
Situata në këtë bashki është ndërlikuar për shkak se i zgjedhuri i Edi Ramës për kryebashkiak, Valdrin Pjetri, është subjekt i ligjit të dekriminalizimit, për shkak të një dënimi të padeklaruar në formularin e vetëdekriminalizimit, të dhënë nga Gjykata e Firences.
Referuar situatës në këtë bashki, raportohet se Rama ka kërkuar një reformim të thellë të administratës së bashkisë, edhe pse më parë kishte deklaruar se nuk do të ketë largime masive nga administratat e njësive vendore, që më parë drejtoheshin nga opozita.
Por duket se Rama ka ndryshuar qëndrim dhe me tone të prera ka deklaruar se do të bëhet një ndryshim radikal.
“Duhet të largohen drejtorët me të mirë ose me të keq”, mësohet të ketë deklaruar Rama, ndërsa ka ngarkuar deputetin Luan Harusha për të ndjekur procesin.
Në porositë e tij, Rama ka kërkuar që në postet kyçe në pushtetin vendor të emërohen vetëm gra, çka duket se ka si shkak frikën e Kryeministrit se mos të emëruarit e rinj mund të kenë probleme me ligjin e dekriminalizimit.
