Nga Boldnews.al
E mo djalë. U ngjite lart në pemë, një mace e vogël kishte mbetur atje, e zonja e maces me të drejtë u shqetësua për këtë kafshë shtëpiake të dashur. Por ka burra ky vend, ka shtet, ka ndjeshmëri dhe kush më mirë se një polic bashkiak do e shpëtonte macen? Sigurisht me ca kamera poshtë që filmonin operacionin, i cili më pas duhet të përdoret për propagandë.
Një orë luftë me pemën, mes duhmës së nxehtë të asfaltit dhe në sytë e qindra qytetarëve kurreshtarë me pyetjen që të mban në ankth: “A do e kapë polici i Bashkisë së Tiranës macen; a do e ulë në tokë shëndoshë e mirë; a do bëhet lajm nga kryetari Erion Veliaj? Ankthit dhe frikës i erdhi fundi; macja zbriti shëndoshë e mirë…
“Po si hipe aq lart o xhan. Fill pas sinjalizimit, ekipi i Policisë Bashkiake dhe zjarrfikësit e Tiranës kthyen kotelen që kish mbetur në pemë, tek e zonja”-shkruan në profilin e tij në Facebook Erion Veliaj, që e shoqëron këtë “aksion të madh” me plot tetë fotografi. Deri në këtë pikë asgjë nuk ka për të mos e marrë në konsideratë punën e kryer, pacaka se para se të niseshin kishin lajmëruar gjithë zyrën e “marrëdhënieve publike” në Bashki që të ishin gati.
Kotelen e shpëtuan! Bravo çuna, e zonja e koteles sigurisht që u lumturua, polici bashkiak u bë hero… Tani punë të tjera i presin, ata shpesh lajmërojnë njëri-tjetrin për të mësyrë në rrugët e Tiranës. “Një grua plakë po shet tufa majdanozi buzë trotuarit, dyshohet se ka edhe sallatë në çantë”-vjen njoftimi. Dy policë krehin zonën në terren, pjesë tjetër që janë grupi i gatshëm qëndrojnë në distancë për të zhvilluar operacionin blic. E shkreta plakë mundohet të shpëtojë majdanozin dhe sallatën, bën të ngrihet e ikë me vrap, po këmbët e tradhtojnë, forcë nuk ka. Përfundimi është se asaj i sekuestrohet malli, i vendosin një gjobë dhe i japin disa të shtyra.
Janë dhjetëra video ku policët e Bashkisë Tiranë dhunojnë shitësit fshatarë buzë rrugës. Në rast se ata kundështojnë mes klithjeve: “Mos ma merrni mallin, jam pa bukë”-ata të tregojnë ligjin, të përplasin në tokë, të rrëmbejnë atë pak mall dhe ikin si skiftera.
Këtë e argumentojnë me zënien e hapësirave publike, madje një arkëz të vogël e quajnë bllokues trotuari, ndërsa kioskat me lejen e bashkisë që të vëjnë të ecësh skiç janë krejt normale për bashkinë e kryeqytetit.
Tashmë në këtë periudhë ka nisur një tjetër fushatë. Është koha e misrapjekësve. Kudo gjenden policë të bashkisë që vigjilojnë pas cepave të pallateve dhe të zenë gafil. Dhunë mbi ta, rrëmbim misrash, mangallësh dhe qymyrin e drurit, pa haruar edhe tu japin një dru të mirë shitësve ambulant.
Lutjet e tyre se janë fukarenj dhe detyrohen të dalin për të nxjerrë ndonjë qindarkë në rrugë nuk dëgjohen, as reagimi qytetar që shpreh keqardhje. Sanija, Ismeti, Frani apo Llazi që shesin rrugëve përjetojnë dhunën e bashkisë. Këto video dhe foto kryetari nuk i hedh ndonjëherë në facebookun e tij, sa për propagandë, kemi macen që u shpëtua.
