Deputeti i Partisë Socialiste, Spartak Braho, ka reaguar lidhur me denoncimin e bërë nga ish-kryeministri Sali Berisha, sipas të cilit njërit prej djemve të tij i është bërë një pritë nga dy persona të armatosur.
Berisha tha se ngjarja ka ndodhur në 18 gusht, por policia ka fshehur ngjarjen.
Më pas, ka reaguar policia e cila ka sqaruar se mes dy djemve të deputetit ka pasur një konflikt me persona të tjerë për çështje parkimi makinash.
“Më datë 19.08.2019 filloi procedimi penal për shtetasin A.B., 38 vjeç, banues në Durrës, sepse më datë 18.08.2019, në lagjen Nr. 4 Durrës, pas një konflikti për motive të dobëta ka goditur me sende të forta shtetasit A. K., 58 vjeç, dhe L.K., 30 vjeç duke i shkaktuar dëmtime trupore. Neni 89 i K.P.
Specialistët për Krimet në Komisariatin e Policisë Durrës kanë shpallur në kërkim dhe po punojnë për kapjen e shtetasit L.K., 26 vjeç, banues në Durrës pasi për motive të dobëta dyshohet se ka kanosur me armë zjarri dhe i ka thyer xhamat e 2 mjeteve shtetasit K.B., 35 vjeç, banues në Durrës”, thuhej në njoftimet e policisë.
Ndërkohë deputeti Braho në reagimin e tij e konsideron një ngjarje banale “e provokuar nga një mik i droguar dhe u armatosur i gjysh Berishës, e cila iu relatua policisë”.
Deputeti socialist s’pranon se është takuar për sqarim me personat në fjalë ashtu siç thuhet në mesazhin e publikuar nga Berisha.
“Një shpifje e zakonshme e qoftë largut se unë jam takuar për sqarim me personat në fjalë. Denoncimi ndaj personit, që ka 7 vjet në kërkim për provokimin e bërë, iu bë organeve të policisë së shtetit”, shprehet Braho.
