Dosja 184, e cila zbardh gjithë skemën e manipulimit të votave në qarkun e Dibrës, dhe sipas përgjimeve të publikuara nga BILD, janë të përfshirë drejtuesit më të lartë të Rilindjes, nga ish-ministri Damian Gjiknuri, ish-deputeti Pjerin Ndreu, drejtues të policisë dhe institucioneve lokale, personazhe të inkriminuar, madje edhe “Babloku i madh”, Edi Rama.
Dosja në fjalë për 3 vite u mbajt nga prokuroria e Krimeve të Rënda, ndërsa rreth 1 muaj më parë, prokurori i çështjes, Klodian Braho, vendosi të transferojë hetimet drejt prokurorisë së Dibrës, duke ndryshuar akuzat.
Transferimi i dosjes shkaktoi reagime të shumta, veçanërisht nga opozita, e cila akuzoi Prokurorinë se po vepron si vegël e Rilindjes, dhe synon mbylljen e dosjes, dhe shpëtimin e personazheve të kapur në përgjime.
Prokurorja e Përgjithshme, Arta Marku, në sqarimin e saj, ia ka kaluar përgjegjësinë prokurorit të çështjes, duke tentuar të shmangë veten nga çdo përgjegjësi.
E në kulmin e debateve, karikaturisti i njohur Bujar Kapexhiu, në punimin e rradhës, botuar në Mapo, ka ironizuar pikërisht varrosjen që po i bëhet dosjes 184.
Në karikaturën e Kapexhiut shfaqen Edi Rama, Sander Lleshaj, Taulant Balla dhe Arta Marku, që mbajnë kurora me lule, ndërsa dosja 184 jepet në formën e një arkivoli.
