Identifikohet autori i plagosjes me armë zjarri të 26-vjeçarit Indrit Çelaj në Tiranë. Burime zyrtare nga policia konfirmuan se autori u shpall në kërkim policor, ndërsa konflikti mes të dyve nisi për motive të dobëta.
“Drejtoria Vendore e Policisë Tiranë, menjëherë pas marrjes së njoftimit se në Spitalin Ushtarak ka shkuar një person, i cili ishte plagosur me armë zjarri, ngriti një grup të posaçëm hetimor për zbardhjen e kësaj ngjarjeje. Specialistët për Hetimin e Krimeve të Rënda në Drejtorinë Vendore të Policisë Tiranë falë veprimeve të shpejta dhe profesionale bënë të mundur zbardhjen e ngjarjes dhe shpalljen në kërkim të autorit të dyshuar, shtetasit L.V, banues në Tiranë”, njoftoi policia.
Ngjarja – Sipas një rindërtimi të ngjarjes nga policia, rreth orës 11.30, në rrugën “Muhamet Gjollesha”, në një vilë trekatëshe, Çelaj ishte duke kryer punime për kondicionimin e vilës në pronësi të shtetasit B.K.
Nga hetimet paraprake dyshohet se 26-vjeçari, pas një konflikti të çastit me shtetasin L.V., ky i fundit e ka plagosur në kokë me armë zjarri pistoletë dhe është larguar menjëherë nga vila. Ndërsa i plagosuri, lindur në Mallakastër e banues në Tiranë, ndodhet në Spitalin Ushtarak në gjendje të rëndë shëndetësore.
“Grupi Hetimor nën drejtimin e Prokurorisë së Rrethit Gjyqësor Tiranë po vijon punën për zbardhjen e plotë të rrethanave të ngjarjes, si dhe dokumentimin me prova ligjore të autorësisë së kësaj ngjarjeje. Ndërkohë shërbimet e Policisë po vijojnë kontrollet për të bërë të mundur kapjen e autorit të dyshuar L.V.”, njoftoi policia.
