Në shtëpinë e prokurores speciale të Maqedonisë Katica Janeva në Kozle, janë konfiskuar mobilje.
Mobiljet e sekuestruara, ishin dhuratë për Katican nga një i afërm i biznesmenit Orce Kamçev dhe në to ishin instaluar përgjues, raporton media maqedonase republika.mk, duke cituar burime nga grupi hetimor.
Pajisja dyshohet se përgjoi bisedat e Janeva në shtëpinë e saj, si dhe telefonatat.
Personi që ia kishte dhuruar mobiljet prokurores është i afërm i biznesmenit të përfshirë në çështjen për të cilën u arrestua Janeva.
Prokuroria Themelore Publike kërkoi 30 ditë burgim për Janevën, të arrestuar sot, për shkak se ajo dyshohet se ka keqpërdorur detyrën për përfitime personale në rastin “Reket”.
Konkretisht, ajo bashkë me persona të tjerë, dyshohen se kanë marrë 1.5 milion euro rryshfet nga biznesmeni Orce Kamçev, duke i premtuar masa lehtësuese, apo edhe lirim nga akuzat në procesin gjyqësor që po zhvillohen kundër tij.
