Dy shqiptarë janë dënuar me burg pasi në shtëpinë e tyre policia zbuloi 100 bimë kanabis sativa. Autoritetet britanike në Darwen kontrolluan banesën e dy shqiptarëve pas ankesave të fqinjëve për erën e kanabisit. Aty gjetën dy shqiptarë, të identifikuar si Mentor Vata dhe Shpresim Vehapaj.
Vata 26 vjeç dhe Vehapaj 26 vjeç nuk kishin një adresë fikse dhe nuk kishin dënime të mëparshme në Mbretërinë e Bashkuar.
Kontrolli ndodhi në 24 qershor, ndërsa dy shqiptarët Mentor Vata dhe Shpresim Vehapaj u dënuan respektivisht me dy vjet dhe 4 muaj burg. Por përfaqësuesja i gjykatës i tha dy shqiptarëve se ata do t’i nënshtroheshin procedurave të dëbimit.
Dy shtetasit shqiptarë e kishin shndërruar banesën e tyre në një laborator të vërtetë të kultivimit të kanabisit, pasi ata lëndën narkotike e kishin mbjellë nëpër dhoma.
Në dhomën e parë oficerët gjetën rreth 20-30 bimë, në fazën e hershme të rritjes, si dhe llamba për ndriçimin e lëndës narkotike.
Në dhomën e dytë u gjetën rreth 20-30 bimë, në të njëjtat kushte që ishin edhe në dhomën e parë. Ndërsa në dhomën e tretë u gjetën bimë të thara dhe në papafingo u gjetën rreth 50-60 bimë.
Po ashtu kishte informacione se energjia elektrike në banesë merrej në mënyrë të paligjshme.
Avokati i dy shqiptarëve, Adam Watkins tha se dy klientët e tij kishin hyrë në mënyrë të paligjshme në Britani, në kërkim të një jete më të mirë. Ai u shpreh para gjykatës së dy shqiptarët do ta kishin të vështirë në burg pasi nuk mund të flasin anglisht.
Për Mentor Vatën, avokati tha se erdhi në Britani me kamion, duke shpresuar se do të gjente punë, me të cilën do të ndihmonte familjen në Shqipëri.
Ndërsa për Shpresim Vehapaj, avokati deklaroi se ai kishte punuar në sektorin e ndërtimit në Londër dhe se ndodhej në atë banesë vetëm për disa orë.
