Partia Demokratike e Shkodrës ka paralajmëruar zhvillimin e një proteste ditën e sotme, në një kohë kur Prefekti ka thirrur mbledhjen për konstituimin e Këshillit të ri Bashkiak të dalë nga votimet e 30 qershorit.
Sikundër raportohet, forca të shumta policore, përfshi edhe ato të Ndërhyrjes së Shpejtë në qarkun e Shkodrës, prej mbrëmjes së të dielës dhe në orët e para të mëngjesit të sotëm janë në gadishmëri dhe të gatshme për të ndërhyrë në rast të precipitimit të situatave.
Mbledhja e konstituimit të Këshillit Bashkiak pritet të bëhet në një nga auditoret e Universitetit Luigj Gurakuqi, edhe pse nga PD dhe mjaft emra të njohur të qytetit të Shkodrës i është bërë thirrje rektorit të mos lejojë një maskaradë të tillë.
Përmes një deklarate, dega e PD-së shprehet se rilindasit zgjodhën ish-Komitetin e partisë për të konstituar këshillin ilegjitim vetëm për të provokuar qytetarët e Shkodrës.
“Ne nuk mund të pranojmë të jemi dëshmitarë të vendosjes së një tjetër regjimi”, thuhet në deklaratë.
Raportohet se policia ka marë masa edhe në hyrje të Bashkisë, ku mund të ketë përplasje.