Një ngjarje e rëndë ka ndodhur mesditën e sotme në Greqi. Një grua shtatzënë humbi jetën dhe një burrë mbeti i plagosur pasi makina me të cilën udhëtonin u përlas nga treni.
Ngjarja ka ndodhur në zonën Diavati, në perëndim të Selanikut. Makina u përplas ndërsa kalonte hekurudhën nga treni i linjës Alexandroupolis-Selanik, tetë kilometra jashtë Selanikut.
Gruaja, e cila ishte rreth 20 javëshe shtatzënë, fillimisht u dërgua në spital në gjendje të rëndë ku edhe ndërroi jetë.
Ndërsa drejtuesi i mjetit, rreth 50 vjeç, është në gjendje të qëndrueshme dhe po trajtohet në spital. Mësohet se ai ka lëndime të lehta të kraharorit.
10 zjarrfikës me 3 automjete, si dhe ambulanca ishin të pranishëm në vendngjarje.
