Me pantallona të shkurtra dhe shapka, Mihal Kokëdhima, pronari i restorantit në Porto Palermo ku ndodhi incidenti me turistët spanjollë, ka dalë sot para gjykatës së Vlorës, për t’u njohur me masën e sigurisë.
Ai u shfaq i qetë para gjykatës, ndërsa në krah të tij qëndronin dy avokatë.
Pritet që ndaj tij të vendoset masa e arrestit me burg, pas publikimit të pamjeve të frikshme, ku ai shfaqej mbi makinën e turistëve spanjollë.
Kokëdhima përfaqësohej në seancë nga dy avokatë, ndërsa gjyqtare e çështjes është Esmerilda Habilaj.
Avokatët mbrojtës kanë kërkuar masë sigurie më të butë, duke ofruar edhe garanci pasurore deri në 3 mijë euro.
Sipas avokatëve, asnjë nga akuzat nuk qëndron për ta mbajtur prapa hekurave, ndërsa shtojnë se klienti i tyre nuk ka rrezikshmëri shoqërore.
“Më morën zvarrë me makinë. Ç’është kjo punë nuk kam prekur njeri me dorë. Ku kanë faktet që i preka me dorë. Më rrëzuan në Qeparo, nga makina. Unë nuk e theva xhamin për t’i dëmtuar por për t’u mbajtur.
Unë u mora targën, telefonova policinë. Ata futën marshin të më shtypnin, dhe unë u hodha ne kriskot. Kam dy fëmijë në shkolle në Gjermani. Ne dy muaj punojmë. Më lini të punoj”, raportohet të ketë deklaruar Kokëdhima në sallën e gjyqit.
Kokëdhima akuzohet për “kanosje”, “dëmtime të tjera me dashje” dhe “shkatërrimi i pronës”.
