Pjerin Ndreu, kryebashkiaku i Lezhës i dalë nga votimet e 30 qershorit që opozita dhe Presidenti Meta i cilësojnë të paligjshme, i është përgjigjur akuzave të kryedemokratit Lulzim Basha.
Më herët gjatë kësaj të shtune, Basha publikoi një video në Facebook, ku listonte personazhet e “bandës së kriminelëve dhe hajdutëve me të cilët Edi Rama ka zaptuar çdo pushtet për të vjedhur Shqipërinë”. Mes tyre ishte dhe Pjerin Ndreu. “Pjerin Ndreu në listën e zezë të partnerëve prej vitit 2003. I larguar nga policia për përfshirje në trafiqe, i kapur në përgjimet e manipulimit zgjedhor në dosjen 184, nuk dënohet, por kandidohet dhe mbrohet nga Edi Rama”, thuhej për Ndreun.
Pas kësaj, me një reagim në Facebook, Ndreu paralajmëroi padi ndaj Bashës.
“Per Lulezim Bashen: Zoti kryetar i opozites te pres per nje vizite ne Bashkine e Lezhes ku te diskutojme per zgjidhjen e problemeve dhe zhvillimin e qytetit. Keni rol per te luajtur ne planet e zhvillimit dhe jam gati te ve shiritin e te pres.
Sa per inkriminimin tim se shpejti shihemi ne Gjykate. As ti e as perendia ne qiell nuk ka shansin te me gjeje qofte nje element sado te vogel inkriminimi. Kohe para teje jane bere prova serioze nga me te zote se ti per te me gjetur fakte e prova inkriminimi, por kane deshtuar me turp. Leri llafet ne ere se I sqarojme ne gjykate, por me thuaj kur do vish ne Lezhe te pres !”,- shkruan ai.
