Mjeshtri i karikaturës, Bujar Kapexhiu, përmes një punimi të fundit, ka zbuluar armikun më të madh të Edi Ramës, që është pikërisht Kryeministri.
Kapexhiu duket se ka analizuar sjelljen dhe reagimet e Ramës sa herë që të mandatuar dhe të përzgjedhur të tij, kanë probleme me ligjin, apo janë subjekt i ligjit të dekriminalizimit.
Së fundmi Ramës i kanë dalë probleme me të përzgjedhurin e tij si kryebashkiak të Shkodrës Valdrin Pjetrin, të cilit gjithashtu e emëroi edhe si drejtuesin politik të PS-së për qytetin më të madh në veri të vendit, duke mënjanuar ish-ministrin e Jashtëm, Ditmir Bushati.
Pas publikimit nga opozita të dokumenteve që provojnë se Pjetri është dënuar në Itali me 18 muaj burg për shpërndarje droge, Rama ka nisur distancimin, shumë më shpejt se kur u përball me rastet e ngjashme si për Elvis Roshin e Kavajës, apo grupin e deputetëve që i kishte në mandatin e parë si Kryeministër.
Kapexhiu në punimin e fundit, të botuar në Mapo, tregon Ramën që sheh veten në pasqyrë dhe trembet, por jo vetëm kaq, zbulon se armiku i tij është pikërisht vetë.
