Nga Boldnews.al
Kryebashkiaku i Shkodrës Valdrin Pjetri, i dalë nga votimet njëpartiake të 30 qershorit rezulton të jetë i dënuar në Itali për mbajtje dhe shitje të lëndëve narkotike. Një ngjarje e ndodhur në vitin 2003 në Firence, ku ai ishte vetëm 21vjeç. Pa “botë me sy” dhe ndoshta në një moment deliri, edhe për shkak të moshës, iu fut rrugës së drogës, si konsumues i ndonjë cigareje hashash, apo edhe shpërndarje të saj në sasi të vogël, sa për para xhepi…
Historia e tij mund të jetë edhe e shumë të rinjve shqiptarë, por këtë herë kryeministrit Edi Rama i ka plasur në dorë një bombë që ai mendoi se e kishte “hedhur me kohë”… Ai mund të mos ketë qenë në dijeni për këtë “dënim të vogël” të Pjetrit të tij, por fryma politike si qeveris, forma që i jep përmbajtje, me afrimin e katagorisë së të fortëve, trafikantëve, mashtruesve të lindur dhe të korruptuarve që në gen, janë oazi që Rama ka krijuar në stehën e Rilindjes së tij.
Çfarë iu desh Ramës që të kandidonte në Shkodër, në një palë zgjedhje (votime) me fitues të paracaktuar, një personazh me të shkuar “kriminale të vogël”? Kjo enigmë zgjedh problemin me shumë të panjohura, pasi është frymë qeverisëse e kryeministrit dhe jo një dru i shtrembër që prish gjitha stivën e Rilindjes së tij të “pastër”, si uji i kristaltë ku Rama po kridhet në vilën qeveritare në Dhërmi.
Ramës i ra “Pjetri i madh” në Shkodër dhe pikërisht në qytetin që vetëm në këtë mënyrë mund ta merrte, me një palë zgjedhje monopartiake dhe nën diktatin e një qeverie arrogante. Nuk do jetë aspak çudi që “pasues” të Pjetrit të “rënë”, të vendosë një personazh si “Katerina e madhe”, një “virgjëreshë” që më vonë u bë histerike në orgjitë seksuale dhe aferat karruptive të politikës.
Ajo pati shumë dashnorë, nga të cilët historia njeh 21, dhe organizonte festa me temë seksuale shumë shpesh. Dashnorë të saj qenë oborrtarë, por edhe oficerë, ushtarë, marinarë dhe muzhikë që ajo i gjente gjatë udhëtimit.
Pikërisht këtë kërkon kryeministri ynë, pasi i bie një i përzgjedhur i tij për shkak të ligjit të dektriminalizimit, ofron një tjetër individ me të shkuar të pastër, por si gjithnjë me të ardhme të pisët, pasi këtë frymë e dikton vetë. Për më shumë “imoraliteti” personal apo politik, nuk konsiderohen vese, por vlera për Rilindjen e kryeministrit.
Mund të ketë edhe një opsion tjetër, që “largqoftë” edhe vihet në zbatim. Rama, me fijet që i tërheq sipas dëshirës në Prokurorinë e Përgjithshme, mund të ndikojë që ta shpallin të “pafajshëm” Pjetrin, duke mos e çuar procesin deri në fund. Me ligjet në fuqi, Pjetri rrezikon që të procedohet penalisht për falsifikim të dokumentave zyrtare, pasi ka fshehur dënimin në formularin e dekriminalizimit.
E nëse kjo i shkon në mendje “Bablokut të madh” i mjafton vetëm një telefonatë që institucioni i kontrolluar prej tij të vihet në lëvizje për ta bërë të zezën të bardhë dhe për ta shitur më pas nga propaganda qeverisëse si një “akt ligjor, ku folën institucionet e pavarura”. Pjetri i tij fitoi në Shkodër në një proces absurd, ku vetëm 8 % e votuasve iu drejtuan kutive ku vetë vulosnin, vetë firmosnin e po vetë numëronin.
Loja e rrezikshme që mund ta çojë kreun e qeverisë deri në mbajtje me dhunë të kandidatit të tij të preferuar që e bëri Drejtor të Përgjithshëm të Hipotekave, Prefekt në Shkodër dhe më pas kryebashkiak, nuk mund ta lëshojë aq lehtë, pasi mbetet një prurje tërësisht personale e tij. I vetmi motiv që mund të stepë nga kjo marrinë është vetë Shkodra, që nuk mund tia lejojnë që të përbuzen dhe fyhen edhe më shumë.
