Bujar Kapexhiu në punimin e rradhës, të botuar në Mapo, ka goditur entuziazmin e shfaqur nga qeveria lidhur me numrin e turistëve që vizitojnë vendin.
Prej vitesh, thuhet se Shqipërinë e vizitojnë miliona turistë, ndërsa shifrat që publikohen do t’i kishte zili edhe gjysma e vendeve të Bashkimit Europian.
Pushimet e shqiptarëve e ka titulluar karikaturën Kapexhiu, në të cilën shfaqet një familje që improvizon pushime në kushte shtëpie.
Ndoshta, anketa e publikuar së fundmi nga Komisioni Europian mbi Cilësinë e Jetës në vendet e Bashkimit Europian, si dhe vendet kandidate për tu anëtarësuar, ka frymëzuar karikaturistin e njohur për të dhënë realitetin mbi pushimet e shqiptarëve, pa e abukuruar atë.
Rreth 81% e shqiptarëve nuk mund të përballojnë dot as një javë pushime, vlerësohet në anketë, shifër kjo që tregon varfërinë dhe pamundësinë ekonomike edhe të atyre që konsiderohen si shtresa të mesme për të realizuar pushimet.
E megjithatë, Kryeministri Edi Rama, kryebashkiaku i Tiranë, Erjon Veliaj, ministra dhe deputetë nuk ngurojnë që të deklarojnë mbi miliona turistë që zgjedhin Shqipërinë si destinacion, duke paraqitur një realitet krejt tjetër nga ai që realisht ekziston.
