Martin Henze, këshilltar i CDU-së, partisë së kancelares Angela Merkel, ka reaguar sërisht mbi situatën politike në vend, një ditë pasi foli për ekzistencën e përgjimeve ndaj Taulant Ballës dhe Olsi Ramës, vëllait të Kryeministrit Edi Rama.
Henze e cilëson situatën politike në Shqipëri si të komplikuar, ndërsa thekson se zgjedhjet e 30 qershorit, sipas mendimit të tij, janë ilegjitime.
Ai i referohet propozimit të bërë nga disa politikanë gjermanë që kërkonin shtyrjen e zgjedhjeve, ndërsa shton se një narko-shtet si Shqipëria e ka të vështirë të organizojë zgjedhje të lira të ndershme.
Henze thekson se referuar raportit të OSBE/ODIHR, në 30 qershor nuk pati zgjedhje që garantonin lirinë, demokracinë dhe fshehtësinë e votuesve.
“Situata është shumë e komplikuar në Shqipëri nga faktorë të ndryshëm. CDU dhe një grup i deputetëve të saj, kanë këshilluar që zgjedhjet e 30 qershorit të shtyheshin. Duke patur një situatë ku ekziston një dekret presidencial dhe kushtetues zgjedhjet u shtynë për disa muaj më vonë dhe në momentin kur qeveria aktuale ka arritur të neutralizojë Gjykatën Kushtetuese dhe atë të lartë, rrjedhimisht dekreti është i detyrueshëm për tu zbatuar nga organet kompetente.
Për mendimin tim zgjedhjet e 30 qershorit janë ilegjitime pasi ekziston dekreti presidencial që është organi më i lartë kushtetues dhe organet e tjera në momentin kur nuk funksionon Gjykata Kushtetuese që të vlerësojë këtë dekret, atëherë rrjedhimisht ngelet për tu zbatuar. Më lejoni të them dicka. Duke parë vlerësimet paraprake të OSBE-ODIHR, është parë shumë qartë se nuk mund të flitet për një palë zgjedhje demokratike dhe të lira.
Mungesa e Gjykatës Kushtetuese dhe Gjykatës së Lartë, mund të thuhet se në Shqipëri mungon shteti i së drejtës dhe kur mungon shteti i së drejtës, nuk ka demokraci dhe për pasojë nuk ka as zgjedhje demokratike. Dekreti i presidentit për 13 tetorin si datën e re të zgjedhjeve vendore, është vetëm ai që mund të quhet legjitim, nëse do të ndryshohet edhe kjo datë tjetër, unë këtë nuk e di”, shprehet Henze.
Në vijim ai shton se mediat ndërkombëtare kanë treguar disa fakte për manipulimet e zgjedhjeve.
“Ka pasur përgjime të përfaqësuesve të PS të niveleve të larta të lidhur me përfaqësues të lidhur me mafien dhe kjo sipas BILD. Kjo duhet të qartësohet nga ana ligjore nëse është e vërtetë apo jo. Nëse konfirmohet, me njerëz të tillë nuk shkohet në zgjedhje.
Një problem tjetër është se ka pasur punonjës policorë që e kanë kundërshtuar dhe kanë kërkuar azil jashtë shtetit duke e fituar atë. Kjo është shenjë që shteti i së drejtës nuk funksionon pasi sipas lajmeve të mediave ndërkombëtare, është prodhuar masivisht drogë.
Sipas protokolleve të Departamentit Amerikan të Shtetit, Shqipëria është korridor i kokainës dhe heroninës drejt Europës. Kjo flet për narkoshtet dhe një narkoshtet, nuk mund të organizojë zgjedhje demokratike. Megjithatë duhet sqaruar kjo gjë. Korrigjim politik ndërmerret përmes zgjedhjeve”, thekson Henze.
