Drejtoria e Përgjithshme e Burgjeve ka kërkuar një mbikqyrje të veçantë për Gazmir Brakajn, një nga personazhet e bandave të 1997, i cili është dënuar me burgim të përjetshëm dhe vuan dënimin në burgun e sigurisë së lartë.
Përmes një kërkese drejtuar Gjykatës së Elbasanit, Drejtoria e Burgjeve, kërkon mbikqyrje të veçantë për Brakajn me një afat prej 3 muajsh.
Kjo nuk ka aspak lidhje me ligjin 41 bis, që synon kontrollin e rreptë të personazheve më të rrezikshëm në burgje për të cilët dyshohet se vazhdojnë të mbajnë lidhje me ushtarët e tyre jashtë qelisë, njoftoi Top Channel.
Kërkesa e drejtorisë së burgjeve për Gazmir Brakën ju dorëzua gjykatës për shkak së të dënuarit iu gjet një telefon në qeli dhe kjo është konsideruar si shkelje e rregullave në burgje.
Por deri tani sipas vendimeve të shpallura me kërkesë të burgjeve janë vendosur në regjim të veçantë dhe me mbikëqyrje të rreptë 11 të dënuar . Siç thotë një burim i sigurt njëri prej tyre ka tentuar të arratiset, gjashtë të tjerë janë rebeluar ndaj policisë në burgun e Drenovës, ndërsa një i paraburgosur është përpjekur të arratiset nga salla e gjykatës së rrethit gjyqësor Mat.
Burgu brenda burgut është një regjim i posaçëm i përkohshëm që minimizon takimet me të dënuarin ku atij i lejohet vetëm takimi me prindërit dhe bashkëshorten. Mbikëqyrja e regjimit të veçantë përfshin edhe reduktimin e daljes së ajrosjes dhe shmangien e kontaktit të të dënuarit me të dënuarit e tjerë në sektor.
Ndërkohë pritet që në vjeshtë në dy burgje , përkatësisht tek 313 dhe në Peqin të aplikohet edhe regjimi i rreptë 41 bis, i cili do të aplikohet ndaj të dyshuarve që janë pjesë e krimit të organizuar.
