Zgjedhjet janë e vetmja rrugë për të dalë nga kriza politike dhe institucionale që ka përfshirë vendin.
Mëngjesin e sotëm, Presidenti Ilir Meta ka reaguar sërisht lidhur me krizën politike, duke apeluar për gjetjen e zgjidhjes që mundëson sipas tij, hapjen e negociatave me 18 tetor.
“E vetmja zgjidhje janë zgjedhjet. Pa zgjedhje nuk ka demokraci. Pa demokraci nuk ka drejtësi të pavarur. Pa të dyja së bashku nuk ka të drejta dhe ekonomi për të gjithë shqiptarët. Dhe as ndëshkim për politikanët.
Moszgjidhja i shërben vetëm pakicës që nuk njeh rotacion dhe nuk e do çeljen e negociatave të Shqipërisë me Bashkimin Europian, pasi ka për të humbur gradualisht pushtetin e paligjshëm politik, ekonomik dhe mediatik.
18 tetori po afron!”, shkruan Meta në rrjetin social.
Një ditë më parë, kreu demokrat Lulzim Basha deklaroi se zgjidhja e krizës do të kalojë nga prangat në duar të politikanëve që kanë grabitur votat dhe pasuritë e shqiptarëve.
