Arben Malaj, ish-ministër i Financave, aktualisht anëtar i Këshillit Mbikqyrës së Bankës së Shqipërisë, përmes një postimi në rrjet ka reaguar mbi mungesën e një ligji në Shqipëri që mbron konsumatorët nga bankat.
Malaj sqaron se mendimet e tij nuk shprehin qëndrimet e Bankës së Shqipërisë, ndërsa thekson se tregjet financiare janë të prekura shpesh nga marrëveshjet e fshehta të bankave lidhur me koston e kredisë, tarifat e shërbimeve dhe pa qartësitë e përgjegjësive të kredi-marrësve kur nënshkruajnë për kredi.
Postimi nga Arben Malaj*
Shqipëria vazhdon të mos ketë një ligj që mbron konsumatorët e shërbimeve financiare/bankare.
Tregjet financiare janë të prekura shpesh nga marrëveshjet e fshehta të bankave lidhur me koston e kredisë, tarifat e shërbimeve dhe pa qartësitë e përgjegjësive të kredi-marrësve kur nënshkruajnë për kredi.
Shkalla e deformimit dhe abuzimit në tregjet financiare është shumë më e madhe se në çdo industri tjetër, prandaj dhe gjobat për bankat e investimeve që manipulojnë e koston e parasë për përfitime abuzive janë nga më të mëdhatë deri në disa dhjetra miliardë euro.
Pjesë e reformave të eleminimit të deformimeve të tregjeve, është edhe ngritja e një agjensie publike që mbron konsumatorët e vegjël nga tendencat abuzive të bankave dhe fondeve të investimeve.
Shqipëria ka vite që e zvarrit ngritjen e saj. Vonesat janë të pa justifikueshme, duke dëmtuar zhvillimet në tregjet financiare. Vetë niveli i kredive joperformuese të bankave që në sektorin e ndërtimit arritën deri në 50% janë dëshmi e qartë e dështimeve të tregut Pasojat e niveleve kaq të larta të kredive jo performuese direkt ose indirekt i paguajnë depozituesit dhe takspaguesit shqiptarë.
Ngritja e agjensive të tilla që parandalojnë keqpërdorimin e tregjeve dhe mbrojnë konsumatorët e tyre nga deformimet abuzive, konsiderohen refoma strukturore që i mungojnë ekonomisë tonë.
*Ky prononcim nuk shpreh qendrime te Bankes se Shqiperise