Rrëmbeu, dhunoi dhe përdhunoi ish-të dashurën italiane, arrestohet shqiptari 30-vjeçar.
Ngjarja e rëndë ka ndodhur në Itali, ku shtetasi M.M 30 vjeç, shqiptar, ka rrëmbyer dhe ka mbajtur peng në një apartament në Foligno ish-të dashurën e tij, shtetase italiane, nënë e dy fëmijëve.
Mediat raportojnë se shqiptari ka ushtruar dhunë dhe ka përdhunuar për 3 ditë rradhazi pengun e tij, duke mos e lejuar të ketë asnjë komunikim.
Gruaja ka mundur të shpëtojë pasi 30 vjeçari, tashmë i arrestuar, e ka marë me vete në një qendër tregtare. Mediat raportojnë se italiania ka tentuar të hidhet nga makina në parkingun e qendrës tregtare, ndërsa automjeti ishte në ecje e sipër.
E gjithë skena është regjistruar nga kamerat e sigurisë, por edhe nga shumë dëshmitarë, të cilët kanë ndërhyrë duke shpëtuar italianen.
Shqiptari është identifikuar shpejt nga policia, e cila arriti ta arrestonte pak kohë më pas.
