Bernd Borchardt, Ambasadori i OSBE-së në Tiranë, dhe Voltana Ademi, kryebashkiake e Shkodrës, kanë diskutuar për rreth dy orë mbi zhvillimet politike në vend dhe veçanërisht votimet e 30 qershorit.
Burime bëjnë me dije se gjatë takimit, kryebashkiakja i ka shprehur diplomatit të OSBE të gjithë problematikën mbi votimet e 30 qershorit, madje duke paraqitur fakte dhe prova mbi manipulimin zgjedhor, edhe pse kandidati i PS-së, Valdrin Pjetri, nuk kishte rivalë në garë.
Në anë tjetër, ambasadori i OSBE-së nuk ka preferuar të zbardhë detaje mbi takimin, por është mjaftuar duke thënë se janë diskutuar shumë gjëra, përfshi edhe 30 qershorin.
Takimi vjen në një kohë kur Valdrin Pjetri, kandidati i shpallur si fitues i votimeve të 30 qershorit për Bashkinë e Shkodrës, po verifikohet nga prokuroria e Përgjithshme, pas akuzave të PD-së se ai është subjekt i ligjit të dekriminalizimit dhe nuk duhej të kandidonte.
Pjetri, sipas PD-së, ishte ndaluar dhe dëbuar nga Italia, ndërsa për mbi 10 vjet nuk ka shkelur në territorin italian.
Në anën tjetër, kryebashkiaku i Rilindjes është shprehur se do të flasë lidhur me pretendimet e PD-së, pasi më parë Prokuroria e Përgjithshme të reagonte zyrtarisht mbi çështjen.
