Ndryshime në Kodin e Procedurave Tatimore për të parandaluar subjektet që të përdorin marifete përmes vendimeve të gjykatave për t’i shpëtuar masave administrative.
Paralajmërimi është bë nga ministrja e Financave dhe Ekonomisë, Anila Denaj, e cila ka komentuar edhe aksionin anti-informalitet të nisur prej disa ditësh nga qeveria.
“Në hoteleri turizëm janë 2000 subjekte të inspektuara, 1400 subjekte rezultuan me probleme në sigurimin e punonjësve.
Sa i përket karburanteve, janë 231 karburante të kontrolluara. Sa për sipërmarrësit e cigareve, pijeve alkoolike vazhdojnë kontrollet, nuk do të ketë asnjë tolerancë ndaj tyre.
Në fushën e ndërtimit do kontrollohen 160 subjekte me rënie në xhiro. Janë përcaktuar 20 subjekte të mëdha që do të inspektohen. Ka raste që subjektet mund t’i kenë shpëtuar masave ndëshkuese, me vendim gjykate ose marifete të tjera duke na bërë që të marrim masa në ndryshimin e Kodit të Procedurave Tatimore”, tha Denaj.
