Policia ka ndaluar autorin e tretë të dyshuar, të grabitjes me dhunë të kryer në bashkëpunim, të një pike karburanti.
Specialistët për Hetimin e Krimit në Komisariatin e Policisë Peqin në bashkëpunim me shërbimet e Policisë Tiranë, në vijim të punës për kapjen e personave të shpallur në kërkim, bazuar në informacionet e marra në rrugë operative kanë bërë të mundur lokalizimin, kapjen dhe ndalimin e shtetasit me inicialet K.B., 31 vjeç, banues në Tiranë.
Kapja dhe ndalimi i tij u bë pasi Gjykata e Shkallës Parë Elbasan, ka vendosur masën e sigurisë ” Arrest me burg”. Ky shtetas në bashkëpunim dhe me dy të tjerë, të cilët janë arrestuar më parë, nën kërcënimin e armës së zjarrit ndaj rojes të një pike karburanti në Peqin, dyshohet se kanë vjedhur një sasi lekësh dhe disa litra karburant.
Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme.
