Ish-deputetja demokrate, Albana Vokshi, ka reaguar ashpër pas ngjarjes skandaloze, ku nipi i deputetit rilindas, Rrahman Rrahja, rreh barbarisht gruan në sy të policëve dhe këta të fundit nuk bëjnë asgjë për ta ndaluar.
Në reagimin e saj Vokshi thekson se nesër nuk është çudi të dëgjojmë se gruaja qëlloi veten me këmbën e nipit të deputetit Rrahman Rrahja, duke lënë të nënkuptohet historinë e Xhisielës, e cila nga e dhunuar doli dhunuese.
Ja postimi i plotë i Vokshit:
Një tjetër grua u dhunua barbarisht në sy të policisë nga njerëz të veshur me pushtet.
Ngjarja e dy ditëve më parë në Qëndrën Spitalore Universitare “Nënë Tereza” u mbajt e fshehur dhe të gjithë heshtën, sepse askush nuk mund të reagonte para statuseve “fluturuese” të Kryeministrit, që behen lajm me urdhrat e tij.
Edhe Policia e Shtetit, e pranishme në vendngjarje ka parë si të ishte në kinema të gjithë skenën e dhunës dhe nuk arrestoi në flagrancë agresorin e gruas që grushtohej papushim nga nipi i deputetit të Kryeministrit.
Pas publikimit në mediat sociale të kësaj ngjarje të rëndë, policia njoftoi se ka proceduar në gjendje të lirë familjarin e pushtetit, Ramazan Rrahja.
…nesër prisni të dëgjoni se gruaja qëlloi veten me këmbën e Ramazanit dhe më pas edhe u vetë-grushtua…!
