Është goditur me tytën e pistoletës një gazetar dhe njëkohësisht aktor, i cili drejton një emision vere në RTV Ora.
Mësohet se ngjarja ka ndodhur në Ksamil, pasi grupi kishte përfunduar xhirimet në një prej lokaleve të zonës.
Si ndodhi ngjarja?
Një person ka dalë nga restoranti ku kishin përfunduar xhirimet dhe i ka dalë përpara mjetit ku udhëtonte aktori Enea Arapi dhe i ka kërkuar të ndalë makinën. Enea Arapi ka dalë nga makina dhe ka debatuar me personin, i cili mbante një pistoletë në brez.
Personi që e ka goditur me pistoletë i ka kërkuar aktorit të ulë shpejtësinë edhe pse makina nuk ka qenë me shpejtësi të lartë.
Stafi i emisionit në prononcimin për Ora News deklaron se pasi policia kishte shkuar në vendin e ngjarjes, i kishte shoqëruar ata në një shkollë për të denoncuar ngjarjen.
Ata deklarojnë se kamerat e sigurisë të restorantit ku ka ndodhur ngjarja janë hequr dhe për këtë arsye nuk është bërë ende identifikimi i autorit. /OraNews
