Pas vendimit të DASH për ish kryebashkiakun e Durrësit, Vangjush Dako, të cilin e ndalonte atë dhe familjen e tij për të hyrë në Shtetet e Bashkuara të Amerikë ka ardhur dhe reagimi i kreut të PAA, Agron Duka.
Në një postim në Facebook Duka shkruan se shumë shpejt do shpallet “non grata” e gjithë “rilindja”.
“Shumëkujt deklaratat, qëndrimet dhe akuzat e opozitës, mund t’i kenë tingëlluar si pjesë e betejës së politikës për pushtet. Por, pas përgjimeve të BILD, vendimi i Departamentit Amerikan të Shtetit është një provë e qartë se beteja jonë për zgjedhje të lira dhe të ndershme është e drejtë dhe duhet të vijojë deri në fund me çdo kusht dhe me çdo kosto. Kjo nuk është përballje me një individ, por me një grupim të strukturuar, shembja e të cilit do të vijojë vetëm falë bashkimit të opozitës dhe hapjes së saj. Shumë shpejt NON GRATA do të shpallet gjithë ‘Rilindja’!” – shkruan Duka.
