Kryeministri Edi Rama vijon të publikojë në rrjet pjesë nga qëndrimet e artistëve dhe regjisorëve, që në momente të caktuara janë shprehur pro ndërtimit të një Teatri të ri Kombëtar.
Por në asnjë nga deklaratat e bëra publike nga vetë Rama nuk gjen qoftë edhe një emër që të përkrahë projektin e tij me ngritjen e kullave shumëkatëshe dhe mes tyre një godinë Teatri.
Madje edhe regjisori Altin Basha në pjesën që ka publikuar Rama e thotë se duhet një godinë e re, por duke ruajtur pjesën muzeale.
“Qartë dhe shqip, unë mendoj se duhet një godinë e re. Pjesa muzeale mund të zgjidhet brenda godinës së re. Si regjisor, po ju deklaroj me përgjegjësi, se ajo godinë nuk ofron mundësinë për zhvillimin e një krijimtarie cilësore teatrore dhe, për rrjedhim, një cilësi të ulët produkti për spektatorët dhe qytetarët”, shprehet Basha, fragment i shpërndarë në rrjet nga Kryeministri Edi Rama.
Postimi i Edi Ramës
Regjizori Altin Basha, një ndër emrat më të spikatur të gjeneratës së re të krijuesve të skenës, mbështet njësoj si shumica dërrmuese e komunitetit teatror shqiptar, ndërtimin e Teatrit të Ri Kombëtar dhe shembjen e gërmadhës ekzistuese.
ALTIN BASHA:
Qartë dhe shqip, unë mendoj se duhet një godinë e re. Pjesa muzeale mund të zgjidhet brenda godinës së re. Si regjisor, po ju deklaroj me përgjegjësi, se ajo godinë nuk ofron mundësinë për zhvillimin e një krijimtarie cilësore teatrore dhe, për rrjedhim, një cilësi të ulët produkti për spektatorët dhe qytetarët.
