Eduard Duro, kryebashkiaku i Devollit, ka shkuar në zyrën e tij në këtë bashki që në orën 06:30.
Pasi arriti të futej në zyrë pasditen e së premtes, duke hapur dyert me forcë të Bashkisë Devoll, Duro sot ka preferuar të shkojë në bashki shumë më herët se orari zyrtar.
Forca të shumta policie kanë rrethuar godinën e bashkisë, për të shmangur ndonjë përplasje të mundshme, me protestues të opozitës, që janë mbledhur para Bashkisë së Devollit.
Bledion nallbati, ish-kryebashkiaku i Devollit, është shprehur se ai është ende në detyrë, duke deklaruar se Bashkia është pushtuar. Nallbati tha se është zgjedhur nga 59 % e qytetarëve të Devollit dhe ai është kryetar i ligjshëm deri në zhvillimin e zgjedhjeve vendore.
“Do jem në bashki 24 orë duke iu shërbyer qytetarëve”, tha Nallbati që drejtonte protestën e një grupi qytetarësh.
“Sot bashkia është kthyer si burgu 313. Ne do të vijmë prapë këtu nesër. Unë jam kryetar i ligjshëm i zgjedhur në një proces të ligjshëm. Shkallmuan derën në prezencë të policisë”, ka deklaruar Nallbati.
Duro u betua ditën e premte në mesditë, ndërsa në zyrë shkoi pasdite kur u largua ish-kryetari,Bledjon Nallbati.
Në urdhër të Duros dhe në prani të prefektit të Korçës një person çmontoi brazën e derës së jashtme dhe të brendshmet për t’u futur brenda Duro.
