Prej mëngjesit të sotëm, Forca të Ndërhyrjes së Shpejtë dhe policisë, kanë rrethuar godinën e bashkisë së Devollit, ndërsa kryebashkiaku i Rilindjes, Eduard Duro, ka hyrë në zyrën që mbahej nga Bledion Nallbati në orën 06:30.
Disa dhjetra qytetarë, bashkë me kryebashkiakun Nallbati, protestuan para bashkisë, ndërsa Duro konsiderohet si pushtues i institucionit.
E ndërsa Lulzim Basha, kryetar i PD-së, ka paralajmëruar Edi Ramën se po shkon drejt një përplasje me popullin, vjen reagimi i parë nga Rilindja.
Taulant Balla, kreu i grupit Parlamentar të PS-së, dhe i caktuar nga Rama si koordinator i qarqeve në jug-lindje të vendit, shprehet se Bashkia e Devollit me Këshillin Bashkiak dhe Kryetarin e Bashkisë të sapozgjedhur vijon punën normalisht, duke ofruar shërbimet bazë për qytetarët.
“Populli sovran i ka zgjedhur institucionet e veta përfaqësuese në pushtetin vendor të bëjnë detyrën. Për llafe dhe zhurmë kemi LB✌️ që nuk ka nevojë të zgjidhet😂😂😂 edhe brenda të vetëve.
30 Qershori ishte dita e mësimit historik se fjala sovran nuk është një fjalë boshe dhe askush më kurrë s’do të tentojë t’ia marrë popullit sovranitetin për interesa të ulëta dhe hesape të turpshme politike”, shkruan Balla.
Ndërkohë ai ka publikuar edhe vendimin e parë të kryebashkiakut të Rilindjes, që e ka nisur punën me lëshimin e një çertifikate.
