Një oficer i policisë së Durrësit është pezulluar nga detyra, pasi një pushues nga Kosova denoncoi kërcënimet që kishte marrë, nga efektivët, lidhur me denoncimin e grabitjes së 3 telefonave në banesën që kishte marrë me qira.
Nga video e publikuar në rrjet nga pushuesi, shihet sesi oficeri i policisë i thotë se do të përfundojë në burg për kallzim të rremë, nëse nuk rezulton që telefonat t’i jenë vjedhur.
“Mendoju mirë ku i ke lënë, se do të shkosh në burg për denoncim të rremë”, i drejtohet polici, pushuesit nga Kosova, ndërsa ky i fundit kishte njoftuar grabitjen në banesë.
Ndërkohë, lidhur me ngjarjen ka reaguar Drejtori i Përgjithshëm i Policisë së Shtetit, Ardi Veliu, që ka pezulluar nga detyra, pas publikimit të videos, punonjësin e policisë së Komisariatit të Durrësit.
Shkak për pezullimin, sipas urdhërit të Veliut është komunikimi jo etik me një pushues nga Kosova
“Në lidhje me një video të publikuar në rrjetet sociale nga nje shtetas kosovar, i cili ka bërë publik komunikimin jo etik të punonjësit të Policise, sqarojmë opinionin publik se:
Në Sallën Operative të Komisariatit të Policisë Durrës është bërë një njoftim për vjedhjen e 3 celularëve. Me marrjen e njoftimit menjëherë Policia ka shkuar në vendin e ngjarjes dhe ka marrë kontakt me shtetasin kosovar, i cili ka thënë se në banesën e marrë me qera i kishin marrë 3 aparatë celularë.
Pasi punonjësit e Policisë kanë kryer veprimet paraprake, i kanë shpjeguar proceduren që duhej për të bërë kallëzim në lidhje me vjedhjen e celularëve që ai pretendonte, por shtetasi kosovar nuk ka pranuar dhe më vonë ka deklaruar se i ka gjetur celularët.
Gjatë komunimit në lidhje me rastin, Ndihmës/Specialisti i Policimit në Komunitet A.L. ka përdorur komunikim jo etik me shtetasin kosovar.
Për këtë, punonjësi i Policisë është pezulluar nga detyra dhe ndaj tij Drejtoria e Standarteve Profesionale në Drejtorinë e Përgjithshme të Policisë së Shtetit ka filluar hetimin disiplinor.
Policia e Shtetit është e angazhuar maksimalisht për të garantuar një ambient sa më të sigurt për të gjithë pushuesit, vizitorët e turistët.
Policia e Shtetit fton qytetarët të denocojnë çdo rast të abuzimit të punonjësve të policisë me detyrën dhe çdo paligjshmëri në numrin pa pagesë 112, në Komisariatin Dixhital dhe në adresat e tjera zyrtare të Policisë së Shtetit, si dhe në numrin pa pagesë 0800 90 90 të Shërbimit për Çështjet e Brendshme dhe Ankesat në MB, duke garantuar reagim të shpejtë e të paanshëm”, thuhet në njoftimin zyrtar të Policisë së Shtetit.
