Ambasadorja e Francës në Shqipëri, Cristina Vasak, ka vizituar sot ambientet e Teatrit Kombëtar dhe anëtarët e Aleancës për Mbrojtjen e Teatrit.
Sipas asaj që shkruan AMT në profilin në Facebook, diplomatja franceze pa gjendjen e godinës dhe u informua me zhvillimet e fundit. “Sot në Teatër na vizitoi ambasadorja e Francës në Shqipëri, znj. Christina Vasak. Ajo vështroi gjendjen e Tearit, bisedoi me disa nga protestuesit që po qëndronin në Shesh në ato momente, dhe u informua për zhvillimet e fundit”, shkruan Aleanca për Mbrojtjen e Teatrit në Facebook.
Cristina Vasak është një ndër të paktët zëra nga radhët e diplomatëve të huaj në vend, në mos e vetmja, që ka lëshuar kritika në drejtim të shefit të qeverisë Edi Rama.
Në një aktivitet të mbajtur në mesin e muajt, për Festën Kombëtare të Francës, ajo u shpreh: “Nga Shqipëria po ikin të rinjtë dhe shumë të tjerë duan të ikin. Kam vënë re që kryeministri nuk është i shqetësuar për këtë situatë. Shumë të rinj nga e gjithë Europa lëvizin, por, ndryshe nga të tjerët, të rinjtë shqiptarë nuk duan të kthehen më në vendin e tyre. Kjo nuk është diçka e mirë”.
Një mesazh e dha edhe për kolegët e saj: “Diplomatët janë këtu për të kuptuar, mbështetur, shoqëruar, por në asnjë rast për të gjykuar, apo zëvendësuar autoritetet kompetente”. /BN/
