Hyrja e të miturve në qendrat e internetit tashmë do të ketë kufizime. Ministria e Shëndetësisë, ministria e arsimit dhe agjencia e mbrojtjes së të drejtave të fëmijëve kanë propozuar që fëmijët nën 14 vjeç duhet të marrin leje të firmosur nga prindërit për të frekuentuar këto ambiente.
Alma Lleshi Tandili shprehet se të gjitha subjektet private duhet të kenë të afishuar që në hyrje këtë urdhër të ri, duke kërkuar edhe formularin e plotësuar më herët nga prindi.
Sipas saj, formulari me të cilin duhet të pajisen fëmijët gjendet në adresën online të agjencisë dhe duhet firmosur nga të paktën njëri prej prindërve.
Megjithatë nga një vëzhgim bërë në disa qendra interneti duket se ky vendim i qeverisë nuk ka filluar të vendoset në zbatim.
Fëmijët vijojnë të frekuentojnë këto ambiente, dhe askush nuk shqetësohet për ekspozimin nga përmbajtja që mund të aksesojnë në internet.
Ligji i ri u kërkon edhe subjekteve arsimore shtetërore e private që të bllokojnë aksesin e faqeve me përmbajtje pornografike apo faqeve që nxisin dhunë. Inxhinierët e informatikës sqarojnë se bllokimi i këtyre sajteve ka disa mënyra dhe mund të bëhet lehtësisht nga vetë prindërit.
Kontrolli mbetet problematik për sa i përket telefonave celulare.
Për sa i përket monitorimit të subjekteve që ligji i detyron të ndërhyjnë në sistemin e aksesit, është agjencia për fëmijët e ngarkuar për të bërë inspektimin e nevojshëm./Vizion+/
