Eduart Duro, kryebashkiaku i Rilindjes për Devollin, ka marrë që sot zyrën e kryebashkiakut, pasi më parë u konstitua jashtë ambienteve të Bashkisë, këshilli bashkiak.
Duro ka shkuar në godinën e bashkisë, dyert e së cilës janë të mbyllura, kjo edhe për faktin se ora kishte kaluar 16:00, kohë kur përfundon edhe orari zyrtar për punonjësit e administratës.
Duro, shoqërohej nga Prefekti i Korçës, Dhori Spirollari, ndërsa kryebashkiaku në detyrë, Bledjon Nallbati nuk ndodhej në mjediset e bashkisë.
Në kushte të tilla, Duro dhe mbështetësit e tij kanë hyrë me forcë në zyrën e Bashkisë, duke shpërthyer bravat.
Më herët qytetarë të Devollit penguin zhvillimin e mbledhjes së parë të Këshillit Bashkiak në mjediset e bashkisë, me argumentin se procesi nuk është ligjor dhe kushtetues, pasi Presidenti e kishte anulluar mbajtjen e zgjedhjeve më 30 qershor, duke dekretuar 13 tetorin si ditën e zhvillimit të tyre.
Kryebashkiaku i opozitës Nallbati ka paralajmëruar padi penale ndaj gjithkujt që do të dhunojë institucionin.
Dhe referuar ndryshimeve në Kodin Penal të propozuara së fundmi nga Rilindja e Edi Ramës, dhuna ndaj institucioneve dënohet me 5 vjet heqje lirie.
