Presidenti Ilir Meta ka paralajmëruar ashpër kryeministrin Edi Rama se do të përballet me drejtësinë lidhur me instalimin në vend të ligjit të oligarkisë.
Ndërsa depozitoi në Kushtetuese kërkesën për shpalljen anti-kushtetues të ligjit për Teatrin, Presidenti Meta tha se ky ligj i qeverisë është në dhunim të rendit kushtetuese, të akteve dhe marrëveshjeve ndërkombëtare dhe njëkohësisht në kundërshtim të plotë edhe me interesat kombëtare.
Meta u shpreh se ligji për shkatërrimin e Teatrit, është një simbol, një kryevepër, ku si asnjëherë më parë kryhet një krim kushtetues, kombëtar, kulturor dhe e gjitha kjo vetëm në interes të asaj që mund ta quajmë forca e oligarkisë.
“Dua t’i siguroj të gjithë se kam ardhur vetë në Gjykatën Kushtetuese për të dorëzuar kërkesën për të garantuar se Republika e Shqipërisë do të jetë një vend i sundimit të ligjit dhe jo i sundimit të oligarkëve.
Sot u bë një akt kriminal në mëngjes. Ju garantoj se do të veprojë drejtësia shqiptare dhe ajo ndërkombëtare ndaj Rilindasve lokalë dhe atyre ndërkombëtarë, që e lanë vendin pa Gjykatë Kushtetuese.
Fajin që sot jemi pa Gjykatë Kushtetuese nuk e la reforma, por Ramaforma, që shkatërroi KED në 2017 dhe KED në vitin 2018.
Ky është një krim i kapjes së shtetit, përpjekje për të isntaluar me dhunë ligjin e oligarkëve.
Nuk ka forcë në Botë që më ndalon mua si President ti ve para drejtësisë Rilindasit shqiptarë dhe ndërkombëtarë”, u shpreh Presidenti.
