Policia e Shkodrës ka vënë në pranga një person të shumëkërkuar.
Kapet dhe ndalohet një person i shpallur në kërkim për tentativë vrasje, autor i ngjarjes së ndodhur më datë 26.12.2016. Mësohet se në pranga ka rënë Skënder Daija i cili ka plagos shtetasin Syri Mehmetin (Hasani).
Njoftimi
Një tjetër person në kërkim në prangat e policisë
Kapet dhe ndalohet një person i shpallur në kërkim për tentativë vrasjeje, autor i ngjarjes së ndodhur më datë 26.12.2016, si dhe arrestohet një person tjetër për përkrahje të autorit të krimit.
Nga Strukturat e Drejtorisë Vendore të Policisë në bazë të informacioneve të marra në rrugë operative dhe pas një pune të mirëorganizuar në lagjen “Daniel Matlia”, Shkodër, është bërë kapja dhe ndalimi i shtetasit në kërkim:
S.D, 30 vjec, banues në lagjen “10 Korriku”, Shkodër;
Kapja dhe ndalimi i tij u bë pasi Gjykata e Rrethit Gjyqësor Shkodër, në vitin 2017, ka vendosur masën e sigurisë “Arrest në burg” për veprën penale “Vrasje me paramendim, mbetur në tentative” dhe “Prodhimi dhe mbajtja pa leje e armëve”.
Ky shtetas më datë 26.12.2016, tek rrethrrotullimi në dalje të unazës lindore të qytetit Shkodër, ka tentuar të vrasë me armë zjarri shtetasin S.M, duke e lënë të plagosur rëndë.
Gjithashtu u arrestua në flagrancë shtetasi A.Ç. 31 vjeç, banues në Shkodër, për veprën penale “Përkrahja e autorit të krimit”.
Materialet iu referuan Prokurorisë së Rrethit Gjyqësor Shkodër për veprime të metejshme.
Njoftimi i policisë në vitin 2016
Policia e Shkodrës ka zbardhur dinamikën e ngjarjes së ndodhur në Shkodër, ku mbeti i plagosur me armë zjarri S.M, ndërsa autori i dyshuar është ende në kërkim. Policia ka marrë njoftim rreth orës 11:50 nga Spitali Rajonal Shkodër, se kishte shkuar i plagosur me armë zjarri shtetasi S.M. 44 vjeç, banues në Shkodër. Menjëherë nga ana e shërbimeve të Drejtorisë Vendore të Policisë Shkodër, nga të dhënat paraprake u identifikua vendi i ngjarjes i cili ndodhej në afërsi të hotel “Argenti” në Shkodër, ku në vendngjarje u gjetën 2 gëzhoja model 54, të cilat u sekuestruan në cilësinë e provës materiale. Nga deklarimet e marra të dëshmitarëve të pranishëm në vendin e ngjarjes, rezulton se i dëmtuari në një lokal në afërsi të sheshit “Isa Boletini” Shkodër, është kontaktuar jashtë ambienteve të lokalit me një person.
Nga veprimet procedurale të policisë duke u bazuar tek pamjet filmike të cilat janë sekuestruar në cilësinë e provës materiale, dokumentuan faktin se në drejtim të vendit të ngjarjes, autori i dyshuar është nisur me automjetin tip “Mercedez Benz” me targë AA 888 AT, ku dhe më pas dyshohet se ka qëlluar në drejtim të shtetasit S.M. i cili po lëvizte me automjetin tip “Benz” me targë AA 031 NL, ndërsa nga kqyrja e mjetit janë evidentuar dëmtime të shkaktuara me armë zjarri në xhamin e parë. Policia ka mundur të identifikojë autorin e dyshuar, Skender Daija 29 vjeç, banues në Shkodër dhe po punon per kapjen e tij.
Ndërkohë i plagosuri ndodhet në Spitalin Rajonal Shkodër jashtë rrezikut për jetën, ndërsa policia po punon për kapjen e autorit të dyshuar dhe zbardhjen e motivit të kësaj ngjarje. Materialet proceduriale iu referuan Prokurorisë së Rrethit Gjyqësor Shkodër për veprat penale “Vrasje me paramendim e mbetur në tentativë” dhe “Prodhim dhe mbajtje pa leje e armëve luftarake dhe e municionit”.
