Kryetari i Njësisë Administrative Dërmënas në Bashkinë Fier është arrestuar nga policia për shpërdorim detyre.
Në pranga është vënë Dilaver Shyti, i cili njihet si një personat më të afërt të kryebashkiakut të Fierit Armando Subashit. Ky i fundit, drejton bashkinë që prej korrikut të vitit 2015.
Ndërtimet pa lejë në plazh
Arrestimi i Shytit me akuzën e shpërdorimit të detyrës lidhet me ndërtimet pa leje në zonën e plazhit në Darzezë. “50-vjeçari, në kundërshtim me ligjin, ka lejuar ndërtim pa leje dhe ka zënë hapësirat publike në zonën e plazhit Darzezë, duke i dhënë një kontratë qeraje me sipërfaqe 500 metra katror shtetasit A.Sh., 43 vjeç”, sqaruan këtë të martë burime zyrtare nga Policia e Fierit.
Kështu, ndaj Dilaver Shytit u ngrit akuza për shpërdorim detyre, ndërsa 43-vjeçari A.SH., edhe ai i arrestuar, akuzohet për veprën penale “Ndërtim pa leje”.
Sipas policisë, hetimet nisën pas një kontrolli të ushtruar në plazhin e Darzezës nga efektivët e seksionit për hetimin e krimit ekonomik në në Drejtorinë Vendore të Policisë Fier. Dosja me materialet në ngarkim të dy të arrestuarve i ka kaluar Prokurorisë së Rrethit, për veprimet e mëtejshme proceduriale. /BN/
