Ish-ministri i drejtësisë, Ylli Manjani përmes një postimi në facebook ka komentuar largimin e ambasadores gjermane, Susanne Schütz.
Manjani shkruan se ajo nuk e përfaqësoi sa e si duhet shtetin Gjerman dhe shpreson që të pasohet nga ndonjë gjerman profesionist që të marrë e japë më shumë me Shqipërinë reale dhe jo vetëm me sallonet politike!
Postimi i plotë:
Largimi i ambasadores së Gjermanisë nuk më krijon asnjë ndjesi.
E mësova tani që lexova se e paska pritur Presidenti i Republikës. Ky lajm thjesht më solli në vemendje faktin e thjeshtë se Ambasadorët janë thjesht zyrtarë që ju mbaron dhe mandati.
Nuk mendoj se kjo ambasadore e përfaqësoi sa e si duhet shtetin Gjerman, për të cilin kam respekt të veçantë.
Zonjës që kreu detyrën i uroj rrugë të mbarë, shëndet e mbarësi!
Marrtë me vete sa më parë edhe disa ambasadorë të tjerë që më shumë keqpërfaqësuan vlerat e vendeve nga vijnë!
Shpresoj të pasohet nga ndonjë gjerman profesionist që të marrë e japë më shumë me Shqipërinë reale dhe jo vetëm me sallonet politike!
Nuk dua të heq shpresën tek Gjermania si vendi leader në Europë.
