Kryeministri Edi Rama dhe Presidenti Ilir Meta mund të kenë zhvilluar një takim sekret në Gjirin e Lalzit, atje ku Kreu i Shtetit ka rezidencën e tij, buzë detit.
Në kohën kur dy zyrtarët më të lartë të shtetit janë përfshirë në përplasje publike mes tyre, me akuza të ndërsjellëta, duket se “miqtë” e përbashkët kanë ndikuar në një takim në një vend larg syrit të mediave dhe qytetarëve.
Dhe për këtë duket se është zgjedhur i njëjti vend, ai ku Rama dhe Meta u dakordësuan në 2013, për të krijuar një koalicion të përbashkët, i cili më pas u shoqërua nga një marrëveshje bashkëqeverisëse.
Ashtu si në 2013, kur dy liderët e së majtës, njëri në krye të PS-së dhe tjetri në drejtimin e LSI ishin në një situatë tensionesh dhe akuzash të ndërsjellëta, ashtu sikundër edhe sot, ata gjetën mundësinë, kohën dhe ndërmjetësit, për t’u ulur, darkuar në atë që më pas u quajt si “darka e ngjalave”, dhe arritjen e një marrëveshjeje bashkëqeverisëse, edhe pse LSI ishte në një koalicion me PD-në dhe për 4 vite kishte bashkëqeverisur vendin.
Ilir Meta u shfaq në Lalz pak ditë më parë në krah në Nard Kokës, të njëjtit personazh që 6 vjet më parë i siguroi takimin me Ramën, ose anasjelltas, çoi Kryeministrin aktual në vilën e ish-kreut aktual, ku edhe u shtrua darka e “famshme”.
Edhe pak ditë më parë duket se është përsëritur e njëjta skenë. Meta u shfaq me Kokën, ndërsa në mbrëmje, makina e Kreut të Qeverisë, me truprojën më të besuar, ndaloi diku pranë vilës së Presidentit aktual.
Sikundër raportohet shoferi dhe truproja qëndruan në një lokal pranë bregut, në kompleksin luksoz, ku ndodhen vilat e shumë prej politikanëve dhe qeveritarëve.
Media raporton se takimi mes tyre ka ndodhur pikërisht në të njëjtën vilë ku dy liderët e dikurshëm të së majtës, sot drejtues të institucioneve më të rëndësishme të shtetit, u dakordësuan midis tyre. Nuk dihet nëse ka qenë një takim kokë më kokë apo me ndërmjetësim, por sikundër thuhet nga momenti i këtij takimi, “gjakrat” janë ulur dhe palët kanë shmangur përdorimin e retorikave të forta.
Duket se rezultat i saj është edhe lëvizja surprizë e Komisionit Hetimor të ngritur për shkarkimin e Ilir Metës nga posti i Kryeministrit, i cili zellin që shfaqi për largimin e tij nga zyra Presidenciale e zëvendësoi me një kërkesë drejtuar Komisionit të Venecias që i kërkon interpretim.
Dhe derisa Venecia të sjellë një përgjigje, ndoshta mazhoranca e drejtuar nga Rama ka ndryshuar mendim.
Nuk dihet se kush ka kërkuar apo ka hedhur hapin e parë për këtë takim larg syrit të publikut dhe mediave mes Kryeministrit dhe Presidentit, por ky është takim i dytë jo-publik mes Ramës dhe Metës, në një kohë kur publikisht të dy janë pozicionuar si kundërshtarët më të mëdhenj mes tyre.
Ndoshta ditët dhe javët në vijim mund të zbardhin edhe më shumë detaje nga raportet dhe marrëdhëniet politike dhe institucionale mes Kreut të Shtetit dhe Presidentit, sulmet ndaj të cilit nisën me “komandë” dhe u stopuan me “telekomandë”.
