Ramush Haradinaj dha dorëheqjen nga posti i Kryeministrit të Kosovës një ditë më parë, akt që u pasua me reagime të shumta.
Haradinaj shpjegoi se aktin e dorëheqjes e ndërmerrte pas një fletë-thirrjeje nga Gjykata e Hagës.
Krahas reagimeve politike, ajo që tërheq vëmendjen janë reagimet qytetare në mbështetje të Haradinajt, jo vetëm në Kosovë, por edhe në Shqipëri.
Ndërkohë që kryeministri Edi Rama nuk ka reaguar ende zyrtarisht për dorëheqjen e Haradinajt, rrjeti ka shpërthyer në meme duke vënë në lojë jo vetëm atë, por edhe Presidentin e Kosovës, Hashim Thaçi dhe atë serb, Aleksandar Vuçiç.
Haradinaj u përfshi në përplasje publike gjatë javëve të fundit me homologun Rama dhe Presidentin Thaçi lidhur me planin për ndryshimin e kufinjve mes Kosovës dhe Serbisë. Ndërkohë që Rama e Thaçi u akuzuan se mbështesin planin bashkë me Vuçiç.
