Një tjetër rast abuziv del në dritë, ku ka qenë pikërsiht Policia e Shtetit ajo që ka fshehur veprën edhe pse në kundërshtim me ligjin. Mësohet se zyrtari i Ministrisë së Brendshme, më konkretisht Drejtori i Agjencisë për Zbatimin e Reformes Territoriale, Bekim Murati është përfshirë disa javë më parë në një aksident rrugor.
Aksidenti ka ndodhur më 25 qershor pranë institutit të Fiskulturës, ku Murati është larguar nga vendi i ngjarjes, duke fshehur edhe provat për aksidentin.
Sipas burimeve bëhet me dije se së Këshillit të Ministrave i është dërguar shkresa lidhur me një aksident ku është përfshirë automjeti zyrtar me targë AA 781 PM, i cili është larguar nga vendi i ngjarjes.
Sipas shkresës mjeti i takon një institucioni në varësi të MB (Agjencia për Zbatimin e Reformes Territoriale) dhe drejtohej nga drejtori, Bekim Murati. Ky i fundit pasi është përplasur me një mjet, është larguar dhe nuk i ka ndaluar patrullës së policisë rrugore.
Rasti është regjistruar në sistem si “alert”, ndërkohë që drejtuesi i mjetit në historikun e tij si drejtues mjeti ka patur edhe dy raste të tjera për mosrespektim të punonjësit të policisë.
Ndërkohë edhe pse në shkelje flagrante, ende nuk ka një masë për këtë shkelës të ligjit, madje nga ana e institucioneve po bëhet një përpjekje për ta mbulur këtë rast.
