Ilir Mustafaj, me një eksperiencë 23 vjeçare në sistemin e drejtësisë, u shkarkua sot nga detyra e gjyqtarit me vendimin e KPK-së.
Mustafaj ishte gjithashtu një nga kandidatët për gjyqtar i Gjykatës Kushtetuese, por duket se vendimi i KPK-së ia ka ndërprerë karrierën në mes.
Shkak për vendimin është bërë kriteri i pasurisë së gjyqtarit, i cili ka paralajmëruar se do të ankimojë vendimin në KPA.
Gjatë seancës dëgjimore Mustafaj kërkoi dhe ndërrimin e trupit gjykues për shkak të konfliktit që kishte me relatoren Xhensila Pine, por kjo kërkesë u rrëzua.
Mustafaj u shpreh se nga ky vendim nuk ka humbur ai si individ, por ka humbur vendi, Gjykata Kushtetuese, pasi s’do të ketë në përbërje të saj një gjyqtar të ndershëm. Ai tha se ka mbështetur vettingun dhe reformën në drejtësi.
Shkarkimi i Mustafaj e çon në 65 numrin e gjyqtarëve dhe prokurorëve të larguar nga sistemi i drejtësisë pas Vettingut.
