Ministrja e Financave Anila Denaj ka njoftuar në rrjetet sociale bllokimin e një hoteli për shkak informaliteti.
Denaj shkruan se hoteli me sipërfaqe 1000 m2, 31 dhoma dhe 8 punonjës të deklaruar, ka pasur një xhiro në muajin qershor prej 46150 lekësh.
Nga fotot e publikuara nga ministrja e Financave duket se hoteli është bllokuar nga organet tatimore.
Por, forma e përdorur nga Denaj për të luftuar informalitetin përmes rrjeteve sociale, të jep përshtypjen jo të një aksioni serioz, por më tepër një show të rradhës.
“A është e mundur që një hotel me sipërfaqe 1000 m2, 8 punonjës të deklaruar dhe 31 dhoma, ka deklaruar si xhiro për muajin Qershor 46.160 Lekë.
Ndërkohë vetëm në ditën që është bërë bllokimi xhiro ka qenë 127.000 Lekë.
Një biznes tjetër me sipërfaqe 1000 m2, 4 dhoma dhe 9 punonjës të deklaruar, përveç se deklaron një xhiro fiktive konstatohet për të dytën herë që nuk lëshon kupon tatimor! #STOPINFORMALITETIT✋”, shkruan ministrja në rrjet.
Jo pak herë ministra të qeverisë Rama kanë përdorur forma të tilla, duke publikuar raste në rrjetet sociale, për të krijuar idenë se po luftohet fort një fenomen i caktuar, qoftë edhe informaliteti.
Por në përfundim, referuar gjithmonë shifrave të tyre, ka rezultuar se aksionet kanë qenë thjesht një show, pasi në arkën e shtetit kanë munguar milionat.
