Alfred Nushi, ish-drejtor i Policisë së Fierit, ka dëshmuar sot lidhur me dosjen e njohur si “Babalja”.
Nushi, aktualisht nëndrejtor i policisë në Fier, rezulton nga përgjimet si i implikuar në manipulimin e shtetasit Fredi Alizoti.
Nushi ka pohuar se ka njohje me Alizotin për shkak të detyrës, sikundër ka shtuar “po shkoja në Tiranë, kur jam kthyer nga rruga për të takuar Alizotin”.
“Alizoti telefonoi në sallën operative për të bërë denoncimin”, ishte një tjetër thënie e Nushit, i cili ka dëshmuar në lidhje me dosjen në fjalë.
Madje, Nushi ka pohuar se Alizoti në takimin që ka pasur, i ka kërkuar edhe lekë se s’kishte ku të rrinte.
Kjo tregon se mes tij dhe Alizotit ka pasur më shumë se një njohje, duke pasur parasysh faktin se një qytetar me precedent penalë të kishte guximin t’I kërkonte drejtorit të Policisë së Qarkut lekë.
“Më thanë që Alizoti ka një çështje të hapur në Tiranë, e solla në Tiranë dhe pasi doli nga prokuroria i kam dhënë 30 mijë lekë.
Jam njohur me Alizotin për shkak të detyrës. Me Alizotin nuk kam biseduar më shumë se 3 herë”, deklaroi Nushi.
