Gjykata për Krime të Rënda vendosi këtë të martë të mos çojë për gjykim themeli dosjen në ngarkim të ish-deputetëve të PS-së Arben Ndoka dhe Arben Çuko (ish-drejtori i burgjeve).
Në seancën parapake, trupi gjykues ia ktheu mbrapsht dosjen prokurorisë për hetime te mëtejshme dhe i la afat deri në 30 tetor për gjetjen e provave të reja.
Trupi gjykues u shpreh se nëse organi i akuzës nuk sjell prova të reja në ngarkim të të pandehurve, atëherë çështja do të pushohet.
Arben Çuko (Ish Drejtor i Përgjithshëm i Burgjeve), akuzohet për kryerjen e veprës penale “Korrupsioni pasiv i funksionarëve të lartë shtetërorë ose i të zgjedhurve vendorë”.
Ndërsa Arben Ndoka akuzohet se ka qenë ndërmjetës në rastin e rryshfetit, që sipas organit të akuzës ka marrë Çuko, për transferimin e të dënuarit Olsi Karagjozi nga vendi i vuajtjes së dënimit në IEVP Burrel, në një vend tjetër vuajtje dënimi, sipas preferencës së vetë të dënuarit, në IEVP Fier.
Të pandehurit e tjerë të çështjes
- Qerim Musha, akuzuar për veprën penale “Korrupsioni aktiv i funksionarëve të lartë shtetërorë ose i të zgjedhurve vendorë”, në bashkëpunim, parashikuar nga neni 245, 25 i Kodit Penal.
- Olsi Karagjozi, person që po vuan një dënim të mëparshëm, i akuzuar për veprën penale “Korrupsioni aktiv i funksionarëve të lartë shtetërorë ose i të zgjedhurve vendorë”, në bashkëpunim, parashikuar nga neni 245, 25 i Kodit Penal.
- Artur Balla, i akuzuar për veprën penale “Korrupsioni aktiv i funksionarëve të lartë shtetërorë ose i të zgjedhurve vendorë”, në bashkëpunim, parashikuar nga neni 245, 25 i Kodit Penal.
- Denis Llaftiu, i akuzuar për veprën penale “Korrupsioni aktiv i funksionarëve të lartë shtetërorë ose i të zgjedhurve vendorë”, në bashkëpunim, parashikuar nga neni 245, 25 i Kodit Penal.
Përveç dy ish-deputetëve të socialistë ndaj të cilëve është vendosur masa e sigurimit personal arrest shtëpie, gjykata ka vendosur arrest me burg ndaj të pandehurve të tjerë.
/BN/
