Ish-deputetja e PD-së, Izmira Ulqinaku u shpreh sot se kandidati i Bindjes Demokratik në Malësinë e Madhe në votimet e 30 qershorit, Pjerin Spathari, mori pjesë në një farsë elektorale.
Spathari, tha Ulqinaku, pas dështimit në votimet e 30 qershorit, është emëruar në postin e Drejtorit të Rajonal të Bujqësisë.
“Në zgjedhjet farsë, Edi Rama emëroi opozitën farsë. Bindja Demokratike nuk është opozitë, as në votimet fallco të Edi Ramës, as në parlament, askund. Farsa e 30 qershorit ishte prova e qartë se ‘Rilindja’ dhe Bindja janë nënë e bijë. Kush ka patur keqkuptimin apo ka menduar ndryshe, sot po i japim fakte se simbioza mes tyre është e pandashme.
Bindja pra është patericë e regjimit kriminal të ‘Rilindjes’, si në votimet fallco, ashtu edhe në vazhdim. Kështu është, si në Shkodër, edhe në të gjithë Shqipërinë. Pjerin Spathari, kandidat i Bindjes Demokratike për bashkinë Malësi e Madhe, tani është emëruar drejtor i Drejtorisë Rajonale të Bujqësisë së ‘Rilindjes’. Ky është shpërblimi për shërbimin e mercenarit”, tha Ulqinaku.
“Misioni i ODIHR-it i ka vënë regjistrimit të Bindjes Demokratike në kundërshtim me ligjin vulën e paligjshmërisë. Shkodra e braktisi Edi Ramën dhe opozitën fallco. Procesverbali i orës 11.00 të datës 30 qershor provon manipulimin kriminal, me pesëfishimin e numrit të votuesve. Edi Rama ka rritur pjesëmarrjen me të paktën 8%, duke përdorur Komisionin Qendror të Vjedhjeve. 30 qershori është i pavlefshëm, është nul, në kundërshtim me dekretin e Presidentit. PD është e gatshme t’u japë shkodranëve dhe shqiptarëve atë që presin dhe meritojnë, ndryshimin. Për ta kthyer maxhorancën refuzuese të 30 qershorit, në maxhorancë për ndryshimin”, shtoi.
