Kryetari Lulzim Basha ka mbledhur kryesinë e Partisë Demokratike dhe ish-grupin parlamentar, këtë të premte.
Aksioni opozitar – Burime nga mbledhja e kryesisë dhe ish grupit, thanë se Basha u kërkoi angazhim maksimal strukturave për vijimin e aksionit opozitar. “Të intensifikojmë takimet me qytetarët, refuzimin e 30 qershorit ta kthejmë në alternativë për të ardhmen”, mësohet të ketë thënë Basha.
Zgjidhja e krizës- Kryedemokrati Lulzim Basha ka folur edhe për zgjidhjen e krizës. Ai ka shprehur qëndrimin e mbajtur më herët se, ajo zgjidhet vetëm me largimin e Ramës nga posti i kryeministrit dhe vendosjes para drejtësisë së pavarur të atyre që kanë vjedhur votat.
“Kjo krizë nuk mbyllet me pazar mes PS-PD, siç po flasin mercenarët e Ramës. Kriza zgjidhet me parime. Parimi i parë, është fundi i pandëshkueshmërisë i atyre që kanë vjedhur votat. Për këtë duhet drejtësi e pavarur, por drejtësi me Ramën kryeministër nuk ka për të patur. 30 qershori është dërrmimi më i madh politik dhe moral i ndonjë pushteti në këto 30 vjet. U faktua ajo që ne paralajmëruam: Është varreza politike e Edi Ramës. Duhet të jemi të qartë në mesazhet tona: Nuk ka kthim pas. Nuk ka ulje në tavolinë me Edi Ramen, me njeriun që vjedh zgjedhjet. Zgjedhje të lira me Edi Ramën nuk ka. Synimi ynë është largimi i tij, është qeveria tranzitore, është krijimi i kushteve për zgjedhje të lira e të ndershme. Do të vazhdojmë aksionin politik, do të vazhdojmë protestat. Është koha të bëhemi gati që përveç protestës, të shpalosim bashke me njerëzit alternativën, që shumicën Rama ik, shumicën që kërkon ndryshim ta kthejmë në një mazhorancës politike dhe qeverisëse”, tha Basha. /BN/
