Artan Koçeku, në kërkim policor për vrasjen e Angjelin Shkambit më 17 dhjetor 2017, është vënë në pranga. Lajmi konfirmohet nga burime zyrtare nga policia e Shkodrës, që e cilëson 29-vjeccarin një person “me rrezikshmëri të lartë shoqërore”.
Arrestimi
Të njëjtat burime shtuan se Koçeku tentoi ti arratisej policisë, por u arrit të vihen në pranga.
“Strukturat e Drejtorisë Vendore të Policisë Shkodër, falë informacioneve të mara në rrugë operative, finalizuan me sukses operacionin policor të koduar “IRON HAND”, ku si rezultat është kapur dhe ndaluar shtetasi Artan Koçeku 29 vjeç, banues në fshatin Pog, Shkodër. Ky person me rrezikshmëri të lartë shoqërore, në momentin e kapjes nga Forca e Posaçme ‘Shqiponjat’, ka tentuar të largohet me vrap, por është neutralizuar dhe shoqëruar në ambientet e D.V.P Shkodër. Për këtë shtetas në lidhje me ngjarjen e ndodhur në datën 17. 12. 2017, Gjykata ka vendosur masën e sigurisë ‘Arrest në burg’. Gjatë kontrollit në automjetin me të cilin udhëtonte, Policia gjeti dhe sekuestroi në cilësinë e provës materiale një armë zjarri tip ‘pistoletë’ me fishek në fole dhe një krehër me fishekë që i përkiste një arme tjetër zjarri tip ‘pistoletë’. Gjithashtu, në automjet së bashku me këtë person, ka qenë edhe shtetasi Rr. D., 24 vjeç, banues në Tiranë, i cili u arrestua në flagrancë për veprën penale ‘Përkrahja e autorit të krimit'”, njoftoi Policia.
Materialet iu referuan Prokurorisë së Rrethit Gjyqësor Shkodër për veprat penale “Vrasja me paramendim”, “Prodhimi dhe mbajtja pa leje e armëve dhe municionit luftarak” dhe “Largimi i të burgosurit nga vendi i qëndrimit”, shtuan të njëjtat burime.
Ngjarja
Artan Koçeku ka përfituar leje shpërblimi nga burgu i Peqinit ku vuante dënimin për ngjarjen e ndodhur në vitin 2013, për veprën penale “Vjedhja me armë”, nuk u paraqit në vendin e vuajtjes së dënimit në ditën e caktuar. Gjatë kësaj kohe, me datë 17.12.2017, ky person ka vrarë me armë zjarri 35 vjeçarin Shkambi, banues në Pulaj, Velipojë, Shkodër.
Vrasja dyshohet se ndodhi për shkak të një borxhi që viktima i kishte autorit për shkak të pazareve të drogës.
Koçeku, në vitin 2018 është përfshirë në një konflikt me armë, dhe gjatë ndjekjes nga Policia, ka braktisur mjetin në fshatin Shtoj i Ri dhe ka mundur të largohet.
